Picha ya Maktaba: Aliyekuwa Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi (katikati), akiangalia uandikishaji kura wa majaribio cha Bunju A
CHAMA CHA DEMOKRASIA NA MAENDELEO -CHADEMA
YANAYOJIRI NJOMBE - BVR
1. Ikiwa zoezi la uandikishaji limeanza leo tarehe 23 Feb na likitarajiwa kuzinduliwa rasmi kesho tarehe 24 Feb na Waziri Mkuu Pinda, Naibu Katibu wa CHADEMA upande wa Tanganyika ameanza Operesheni R2R BVR ambapo asubuhi mpaka mchana alikuwa katika Mji wa Makambako akipitia mitaani pamoja na msafara wa viongozi wa chama hicho ngazi mbalimbali kuhamasisha wananchi kujiandikisha.
Aidha, Operesheni hiyo imehusisha kukagua utaratibu wa uboreshaji kwa kutumia BVR kwenye vituo mbalimbali ambapo imebainika kwamba udhaifu uliokuwepo wakati wa majaribio na mwingine mpya umebainika katika sehemu kubwa ya vituo vilivyotembelewa.
Baada ya kubaini udhaifu huo Mnyika na timu ya maafisa wa CHADEMA iliyoweka kambi katika mkoa wa Njombe ikihusisha wataalamu wa TEHAMA (ICT) wamekutana na Mkurugenzi wa NEC Mallaba na kueleza kuhusu udhaifu huo.
Mfano katika kituo cha Malombwe mpaka saa 6 mchana mashine zilikuwa hazifanyi kazi. Hali kama hiyo imejitokeza katika kituo kituo cha Liamkena ambapo uandikishaji ni taratibu kwa kiwango mpaka saa 4 waliandikishwa watu watano tu.
2. Aidha, pamekuwepo na tatizo la watu wenye mikono yenye vidole sugu kutokana na kufanya kazi ngumu mashine kugoma kuwatambua na hivyo kukataliwa kujiandikisha.
Hali kama hiyo imejitokeza mfano katika kituo cha Sigfrid, Malombwe na vituo mbalimbali. Kufuatia hali hiyo ambapo Operesheni R2R BVR iliamua kutembelea vituo zaidi na kubaini kwamba vipo ambapo mashine hazikuwa zikifanya kazi kabisa mathalani Lumumba.
Kwa ujumla katika vituo vingi ukiondoa matatizo ya mashine upo pia udhaifu wa waandikishaji na waendeshaji wa vifaa vya BVR (Kit Operators) ambao wanashindwa kutumia mashine hizo na walipohojiwa baadhi walikiri kwamba wamepewa mafunzo siku moja kabla ya kuanza uandikishaji huku wakiwa hawajawahi kutumia kompyuta wala kuwa na ujuzi wa ICT.
Wapo waandikishaji ambao walionyesha kutokuwa na ufahamu wa upigaji picha na hivyo kufanya zoezi kwenda taratibu na pia kupiga picha zinazoonekana vibaya.
Kasi ndogo ya uandikishaji huku siku zikiwa saba na kwa kituo inaashiria bayana kwamba wapo wananchi ambapo mwishowe watakosa fursa ya kujiandikisha.
Operesheni R2R BVR imebaini mpaka sasa kuwa pamoja na kutumia alama za vidole mfumo umeacha mianya mpiga kura kujiandikisha zaidi ya mara moja katika vituo tofauti tofauti kwa kuwa hakuna mawasiliano ya kimfumo kati ya kituo kimoja na kingine.
Mfumo unategemea kwamba taarifa zikitumwa kanzidata kuu (central databank) ya tume ndiyo itakayochambua wakati ambapo hakutakuwa na mawakala katika hatua hiyo kuthibitisha uondoaji wa wapiga kura waliojiandikisha zaidi ya mara moja kwa kuzingatia kwamba katika kipindi cha uhakiki wa daftari la awali napo hakuna mwingiliano baina ya daftari la eneo kwa eneo wakati wa ukaguzi.
Aidha, CHADEMA imeweka mawakala katika vituo vyote lakini wanapata vikwazo vya namna vya kudhibiti uchakachuaji katika hatua ya usafirishaji wa takwimu ambapo mifumo miwili inatumika kwa wakati mmoja; wa kutumia simu na ule wa kuhamisha kwa kutumia kifaa cha kuhifadhi taarifa (flash drive) bila uhakiki wa mawakala.
Operesheni R2R BVR katika mazingira hayo haitaishia tu kuwa na mawakala kwenye vituo bali kukagua mfumo mzima.
4. Naibu Katibu Mkuu Mnyika ametaka Waziri Mkuu Mizengo Pinda katika uzinduzi wa BVR Makambako tarehe 24 Feb aeleze namna Serikali ilivyoiwezesha tume kushughulikia udhaifu huo kwa kuzingatia kwamba mabilioni yametumika kwenye zabuni ambayo imeleta vifaa vibofu hali inahitaji uchunguzi kufanyika kubaini iwapo hali hiyo imetokana na ufisadi au imefanywa makusudi kuachia mianya ya uchakachuaji katika uchaguzi.
Mara baada ufuatiliaji huo jioni ya leo patafanyika Mkutano wa uzinduzi wa Operesheni R2R BVR jukwaani katika Jimbo la Njombe Kusini na kesho kutwa tarehe 25 Operesheni R2R inahamia wilaya ya Wang'ing'ombe kwenda kuhamasisha wananchi kujiandaa kujiandikisha.
Tumaini Makene
Mkuu wa Idara ya Habari na Mawasiliano –CHADEMA
*****************************************************************************************************************
TAARIFA HIYO INAHUSIANA NA HII “Mbowe aibua mapya mfumo wa BVR.”
Asema mtaalamu alionya Tanzania haijawa tayari, Usajili ukiendelea utasababisha machafuko ya kisiasa.
Mwenyekiti wa Chama cha Demokrasia na Maendeleo (Chadema), Freeman Mbowe, amedai kuibua nyaraka zinazoonyesha Tume ya Taifa ya Uchaguzi (Nec), ilishauriwa na mtaalamu wa mashine za BVR kutoka Marekani kuwa Tanzania haijawa tayari kwa teknolojia hiyo.
Akifungua kikao cha baraza la uongozi wa chama hicho Kanda za Nyanda za Juu Kusini jana alisema, Mshauri Mwelekezi kutoka Marekani Darell Geusz ambaye ni mtaalam wa mashine za usajili wa wapiga kura kutumia mfumo wa kieletroniki (BVR) alichukuliwa kuishauri Tume kuhusu mashine hizo.
Alisema nyaraka hizo zinaonyesha ushauri uliotolewa na mtaalam huyo kwa Tume ni kuwa Tanzania haijawa tayari kwa teknolojia hiyo kwa sababu hakuna vifaa, utaalam na wataalam.
“Mtaalamu huyo alishauri wakilazimisha kuendelea kuzitumia mashine hizo watasababisha machafuko ya kisiasa nchini,” alisema.
Mbowe pia alitoa nyaraka nyingine zinazoonyesha jinsi Nec imekuwa ikiandaa kwa siri utaratibu wa BVR bila kuwashirikisha wadau.
Wakati Mbowe akiibua madai hayo, Naibu Katibu Mkuu wa chama hicho (Tanzania Bara), John Mnyika, alisema kauli ya Jaji Mstaafu Damian Lubuva dhidi ya viongozi wa siasa aliyoitoa juzi imelenga kufunika kombe mwanaharamu apite.
Juzi Jaji Lubuva aliwaasa viongozi wa siasa kutotumia uboreshaji wa Daftari la Kudumu la Wapiga Kura kama mwanya wa kuanzisha fujo.
Mnyika alisema Chadema hakitanyamaza bali kitaendelea kutaka upungufu katika mashine za BVR kufanyiwa kazi.
Alisema chama chake kimenasa taarifa za mawasiliano kati ya Tume na Taasisi ijulikanayo kama, IPSITI zikionyesha kwamba Nec haijafanya marekebisho ya mapungufu yaliyopo kwenye BVR.
Alisema serikali hususan Waziri Mkuu, Mizengo Pinda, anapaswa kujitokeza hadharani kuelezea sababu za kutoshughulikia upungufu ulio onekana licha ya ripoti ya wataalam kubainisha.
Pia alisema Pinda anapaswa kuueleza umma sababu za serikali kutotoa fedha kamili kwa Tume hiyo ili iweze kufanya kazi kwa ufanisi ikiwa ni pamoja na kutoa elimu kwa wapiga kura.
“Pinda awaeleze Watanzania ukweli kuwa Serikali haina fedha kwa sababu wahisani walisitisha misaada ya kibajeti, hii ilitokana na kashfa za ufisadi wa kifedha,” alisema na kuongeza:
“Wahisani walisitisha fedha za misaada ya kibajeti kabla ya bunge halijafikia maamuzi ya sakata la Akaunti ya Escrow, misaada mingine iliyositishwa inahusu sekta ya maji na afya, ndiyo maana miradi mingi kwenye Halmashauri sasa haisongi mbele,” alisema.
Mnyika alisema mkutano ujao wa bunge wataenda kuyaeleza kwa kina kuhusu misaada hiyo ya maji na afya iliyositishwa.
“Leo tunapata madhara syo tu miradi ya kimaendeleo kukwama, wananchi wanakosa huduma muhimu za afya na maji kwa sababu ya fedha kutumika kwenye mianya ya ufisadi badala ya maendeleo,) “ alisema na kuongeza:
“Ukosefu huu wa fedha umeathiri pia tume katika zoezi muhimu kwa ajili ya uchaguzi utakaowawezesha Watanzania kupata viongozi bora na kuzuia mianya ya ufisadi,” alisema.
Alisema kitendo cha Jaji Lubuva kuvinyamazisha vyama vya siasa wakati BVR zina upungufu ni sawa na funika kombe mwanaharamu apite.
Mnyika alisema chama chake kitaendelea kuzungumzia udhaifu na upungufu huo ambao mwisho unaweza kusababisha watu kuandikishwa zaidi ya mara moja.
Alisema endapo watanyamaza nchi itaingia katika machafuko kwa kuwa upungufu uliopo kwenye mashine hizo ni mkubwa.
“Kuacha kujadili suala hili nchi itaingia katika hasara ya kutumia fedha kwenye uandikishaji wakati huo, hii ni kuruhusu mianya ya uchakachuaji wa uchaguzi na kusababisha kutokuwa huru na haki,” alisema.
Aidha chama hicho kimeonyesha wasiwasi wa kutokamilika kwa zoezi la uandikishaji mwezi Aprili 30 kama ilivyotakiwa kutokana na siku ambazo zitakazotumika kila mkoa.
“Lubuva amesema Njombe watatumia siku 28 wasiwasi wetu ni kwamba ikiwa siku hizi zitatumika na maeneo mengine, itafika Aprili 30, baadhi ya maeneo yatakuwa hayajakamilisha zoezi,” alisema.
Aidha, kutokana na wasiwasi huo, wamemtaka Rais Jakaya Kikwete asogeze mbele hadi uchaguzi mkuu utakapomalizika ndipo lifanyike.
Pia Mnyika amemtaka Spika wa Bunge, Anne Makinda aeleze lini kamati ya bunge itakutana na Tume ili kuepusha nchi kuingia katika machafuko.
Kuhusu kauli ya Tume ya kuvitaka vyama vya siasa kusaidia kutoa elimu uandikishaji kwa wananchi, Mnyika alisema chama chake kimeitikia wito huo na kina kusudia kwenda mkoani Njombe kuzindua kampeni ya elimu ya mpiga kura maarufu kama ‘R to R BVR’ ikimaanisha Region to Region BVR. Hata hivyo, alisema baada ya kupeleka taarifa jeshi la polisi kuhusiana na mkutano wa uzinduzi huo, wamekataliwa kufanya hivyo kwa maelezo kuwa kutakuwa na zoezi la uandikishaji huo.
Alisema licha ya polisi kuzuia lakini wataendelea na zoezi hilo na kumtaka Mkuu wa jeshi hilo awaagize polisi kupokea mikutano hiyo ambayo imekusudiwa kufanyika kila mkoa.
0 maoni:
Post a Comment